F3: Ang Teknolohiya at Responsableng Pamamahayag

Napakabilis talaga ng pagtakbo ng panahon, sing bilis ng agos ng tubig sa ilog na hinihipan ng hangin patungo sa napakalawak na karagatan.

Ang buhay ng tao ay parang isang malawak na karagatan. Hindi ko alam ang aking paroroonan. Hindi ko alam kung ano ang makukuha ko sa hinaharap.

Kaalinsabay ng mabilis na paglipas ng mga araw ay ang malawakang pag-unlad ng teknolohiya. Mga teknolohiya na ang pangunahing nais ay makatulong sa mga tao upang mapadali ang mga gawain sa materyal na mundong ito at buksan ang mas maraming daan para sa pangkalahatang kabutihan. Gamit rin ang mga teknolohiya upang mapaunlad ang ating mga kabataan sa iba’t ibang larangan.

Ilan lamang ang cellphone, laptops, kompyuter, PSP at ipod sa mga modernong kagamitan na sadyang kinagigiliwan ng lahat.

Subalit paano ko nga ba magagamit ng may buong kahusayan at kabutihan ang mga “gadgets” ng aking panahon? Bilang isang kabataan at mamamahayag nasa aking mga kamay ang kasagutan para sa responsableng pagbabahagi ng mga makabagong kaalaman tungkol sa mga makabagong teknolohiya,

Sa kasalukuyang milenyo ang karunungan sa pagsulat at pagbasa ay hindi na sapat upang masabi na ikaw ay “literate”, ang kaalaman sa malawak na konsepto ng internet at bagong teknolohiya, ang kakayahan sa epektibong paggamit, at kritikal na pagsusuri at paggawa ng impormasyon ay kinakailangan upang masabi na ikaw ay “digitally literate”.

Malaki ang bahaging ginagampanan ng mga bagong sibol na teknolohiya sa larangan ng edukasyon, kalusugan, transportasyon, komunikasyon, at libangan.

Maraming postibong epekto ang naidudulot ng mga “gadgets” na ito tulad ng pag-unlad ng antas ng libangan, mas mapadadali ang pagresponde sa mga kaganapan, mas mapabibilis at mapararami ang gawaing maaaring magawa, magkakaroon ng “global networking” o pandaigdigang ugnayan, mas mapalalapit sa iba sa pamamagitan ng komunikasyon gamit ang teknolohiya, at mas makamumura sa ibang paraan.

Sa kabila ng mga positibong dulot hindi maiiwasan na magkaroon ng negatibong epekto bunga ng mapang-abusong paggamit nating mga tao. Ilan lamang sa mga ito ay ang pagiging tamad ng mga tao, maaaring gamitin sa karahasan tulad ng “cyberbullying”, negatibong epekto sa kalikasan, “technicism” o pagiging kampante sa paggamit ng teknolohiya, ang pagkakaroon ng sobrang kaalaman ay maaaring humantong sa mali-maling sitwasyon na kilala sa tinatawag na “information overload” o “infollution”, at ang makabagon teknolohiya sa larangan ng gaming at internet access ay maaaring maka-sira o maka-apekto sa pag-aaral ng mga bata.

Nasa kamay ko at nating lahat ang susi upang maibahagi ang mga kaalaman sa tungkol sa mga “digital” na kagamitan. Sumabay tayo sa mabilis na pagtakbo ng panahon at sabayan ang pagbabago upang maitaguyod ang responsible at mahusay na paggamit ng mga makabagong teknolohiya